دينا 3
المحتويات
الست مراتك.
_ انت عيل قليل الأدب.
_ أنا مش هضربك احتراما لهشام .. بس يكون في علمك .. قليل الأدب ده مش أنا ... دي مراتك اللي تطاولت على أمك وطردتها من بيتك.
فريد هيتجنن .. ازاي ده يعرف الحكاية دي ميعرفش ان هشام حكى لهم ع القهوة قبل ما يسمع إن أمه في المستشفى
_ انت عرفت ازاي
الولد بيدفع فريد بإيده كأنه بيطرده
صاحب هشام بيسيبهم ويرجع ناحية المستشفى وباقي أصحابه بيقنعوا فريد يمشي وواحد فيهم ساب له رقم تليفونه علشان يطمن من خلاله
هشام واقف مع اخواته البنات بيحاول يطمنهم على أمهم مع إنه محتاج اللي يطمنه .. لدرجة إنه بيكدب عليهم.
_ اطمني يا سهيلة ماما كويسة .. هي بس تعبت من الصدمة مش أكتر.
_ يعني أنا السبب .. أنا السبب .. خبر طلاقي هو اللي عمل فيها كده.
_ لا يا إيمان .. متقوليش كده .. هي كان حصل لها موقف مع الحيوان اللي كان هنا ده هو اللي تعبها .. بس هي كويسة.
_ انت كلمتها يا هشام.
_ طبعا .. الدكتور زين خلاني أدخل عندها واتكلمنا وقالت لي خلي اخواتك البنات يرجعوا البيت متخليهومش يتبهدلوا كده.
_ وانا يا هشام .. مش همشي واسيب ماما.
هشام بيحاول يكتم ألمه علشان يقنع اخواته يرجعوا البيت
_ علشان خاطري ياريت نسمع كلامها مرة من نفسنا أنا هخلي خالد يروح معاكم وترتاحوا شوية بدل الوقفة دي وانا هفضل جنبها واهو معايا خمس شباب زي الورد مش هيسيبوني لحظة .. ومعانا الدكتور زين جوة هيخلي عينه على ماما لحد الصبح.
الكل مشي وهشام وأصحابه فضلوا عند المستشفى وحكوله ع اللي حصل واللي عملوه
الدكتور زين خرج ونادى على هشام وقال له إن أمه كانت داخلة على جلطة في المخ والدكاترة لحقوها بالإسعافات اللي عملوها وبالكتير بكرة الصبح هتكون كويسة..
_ متأكد يا دكتور زين يعني مفيش حاجة كده ولا كده
_ أنا تأكدت من كل اللي شافوها اتعمل لها رسم قلب وأشعة ع المخ وتحليل ډم واتضح انها بداية الجلطة دي وأخدت حقن سيولة واتلحقت الحمد لله .. بس ياريت تريحوها علشان شكلها كده عايشة في مولد مليان مشاكل.
_ وانت عرفت ازاي يا دكتور زين
_ أنا عندي نظرة ثاقبة للمريض اللي بيكون غايب عن الوعي بعرف من ملاحه إن كان بيضغط على أعصابه في حياته أو بيعاني من مشاكل أو مقهور أو مهموم أو حتى مرتاح
متابعة القراءة
